مصباح الحق ٹیسٹ کرکٹ میں ا یک ا و ر ریکارڈ اپنے نام کرنےکے قریب

مصباح الحق ٹیسٹ کرکٹ میں   ا یک ا و ر   ریکارڈ اپنے نام کرنےکے قریب....

 شارجہ (مانیٹرنگ ڈیسک) پاکستان کرکٹ کی تاریخ کے کامیاب ترین کپتان مصباح الحق نے کئی ریکارڈز اپنے نام کئے ہیں اور سابق کرکٹرز کے بنائے گئے ریکارڈز بھی توڑے ہیں اور یہ سلسلہ ابھی جاری ہے کیونکہ اب وہ پاکستان کے سابق کرکٹر انتخاب عالم کا ریکارڈ توڑنے کے بالکل قریب ہیں۔ 

تفصیلات کے مطابق شارجہ میں جاری پاکستان اور انگلینڈ کے درمیان تیسرے ٹیسٹ میچ کا ٹاس مصباح الحق نے جیت کر پہلے بیٹنگ کا فیصلہ کیا۔ انہوں نے ٹیسٹ میچوں میں مسلسل چھٹی بار ٹاس جیتا ہے جبکہ قومی ٹیم کے موجودہ منیجر اور سابق کرکٹر انتخاب عالم ٹیسٹ میچوں میں مسلسل 7 بار ٹاس جیت چکے ہیں اور مصباح الحق صرف ایک قدم دوری پر ہیں۔ واضح رہے کہ مصباح الحق ٹیسٹ کرکٹ سے بھی ریٹائر ہونے پر غور کر رہے ہیں تاہم پاکستان کرکٹ بورڈ کے چیئرمین شہریار خان نے انہیں ریٹائر نہ ہونے اور اگلے سال انگلینڈ کے خلاف سیریز کھیلنے کا مشورہ دیا ہے اور قوی امید ہے کہ وہ اس سیریز میں بھی پاکستانی ٹیم کی قیادت کریں گے۔ 

اگر مصباح الحق سیریز کھیلنے انگلینڈ گئے اور ابتدائی ٹیسٹ میچ میں ٹاس جیت لیا تو وہ انتخاب عالم کا مسلسل 7 بار ٹاس جیتنے کا ریکارڈ بھی برابر کر دیں گے جبکہ اگر وہ دو ٹیسٹ میچوں میں ٹاس جیتنے میں کامیاب ہو گئے تو انتخاب عالم کا یہ ریکارڈ بھی اپنے نام کر لیں گے۔