پاک چین اقتصادی راہداری : بھارت کیخلاف سازش ہے ،بھارتی ایئر چیف 

ممبئی(مانیٹرنگ ڈیسک) بھارتی فضائیہ کے سربراہ اروپ راہا نے ہرزہ سرائی کرتے ہوئے کہاہے کہ ایک طرف اقتصادی راہداری کی مدد سے چین اور پاکستان بھارت کے گرد گھیرا تنگ کر رہے ہیںدوسری طرف بحر ہند کے پانیوں میں قذاقوں کو روکنے کے نام پر اپنی آبدوزیں بھیج کر بحرہند میں اپنا اثرورسوخ بڑھا رہا ہے،خطے میں چین کا بڑھتا ہوا اثرو رسوخ بھارت کی سکیورٹی کیلئے چیلنج ہے ۔بھارتی فضائیہ کے ایک سیمینار سے خطاب کرتے ہوئے اروب راہا کا کہنا تھا کہ چین ہمارے تمام پڑوسی ممالک سے معاشی اور عسکری تعلقات بڑھا رہا ہے اور تبت میں ہوائی اڈہ اور ریلوے لائن تعمیر کررہا ہے۔ ایک طرف پاکستان چین کے ساتھ مل کر کشمیر سے گوادر تک اقتصادی راہداری منصوبے پر کام کر رہا ہے جب کہ دوسری جانب چین بنگلا دیش، سری لنکا، نیپال، بھوٹان اور میانمار سے معاشی اور فوجی تعلقات میں بھی اضافہ کررہا ہے، یہ سب بھارت کے گرد گھیرا تنگ کرنے کے لئے ہے۔اروب راہا نے مزید کہا کہ چین نے بحرِ ہند کے پانیوں میں قذاقوں کو روکنے کے نام پر اپنی آبدوزیں بھیجی ہیں اور اس طرح وہ بحرِ ہند میں اپنا اثرورسوخ بڑھا رہا ہے۔ انہوں نے پاکستان پر الزام لگایا کہ وہ مقبوضہ کشمیر میں مداخلت کررہا ہے، پاکستان بیک وقت امریکا اور چین سے تعلقات بہتر رکھے ہوئے ہیں اور دونوں ممالک سے فوجی اور مالی مدد حاصل کررہا ہے۔